立法會行政管理委員會啱啱發表年報，顯示今年立法會嘅投資收入唔比舊年接近八百八十三萬元差，而且仲有一百零四萬元其他收入，計埋政府近四億元撥款，立法會嘅收入有四億零七百幾萬，比舊年有增無減。

其實新一屆立法會都使咗唔少錢，一來議員除加人工外，仲多咗份醫療保險，二來兩度出動「尚方寶劍」《立法會（權力及特權）條例》查雷曼同梁展文事件，令到立法會多咗開支，加加埋埋立法會嘅總開支由○八年接近三億六千萬元，跳升至今年四億零三萬元。

幸好收入方面頂得住，所以截至今年三月底，立法會都有四百七十幾萬元盈餘，就算比舊年八百四十六萬多元盈餘少咗一大截，但表現都總算中規中矩啦！至於營運儲備方面，舊年前立法會主席范徐麗泰退下火線時，有一億四千二百四十萬元，最新儲備則輕微上升至一億四千四百幾萬元。