前晚所見，財爺鬍鬚曾、財經事務及庫務局局長「傻強」陳家強、商務及經濟發展局局長劉吳惠蘭、運輸及房屋局局長鄭汝樺都有嚟，但除咗傻強留低開餐外，其餘三位高官恭喜完就鬆人。

同僚明寸「惹火尤物」

議會同僚近三十個到賀，建制派議員通通到齊，包括工聯會黃國健、富貴黨張宇人、專業會議梁美芬、經濟動力林健鋒同匯賢智庫葉劉淑儀等，連近期被指協助煲呔曾弟婦提早攞番雷曼賠償嘅「大舊石」石禮謙都有現身。

有到賀嘅議員話，當晚一見到大舊石，大棚議員即刻圍住佢，仲幽佢一默話：「你呢期變咗惹火尤物喎！」大舊石畀同僚寸到出面，當堂冇晒癮，只係苦笑一下，乜都冇講。

通常惹火尤物都係用喺靚女身上，用喺大舊石身上似乎有點兒那個，相信連大舊石都頂唔順。

咁又係嘅，早排煲呔曾推慳電膽現金券涉嫌利益輸送益親家，連慶祝佢兩公婆結婚四十周年紀念嘅晚宴都甩底，搞到佢班「曾朋友」當場曝晒光，而大舊石就係其中一個。

點知早幾日又被揭發煲呔曾弟婦買雷曼迷債損手涉嫌獲得私了，畀市民同其他雷曼苦主鬧爆，原來幫煲呔曾弟婦嘅就係「曾朋友」大舊石，件事疑點重重，愈描愈黑，雷曼苦主大聲疾呼要大舊石同煲呔曾弟婦出嚟，向公眾交代清楚件事，同埋公開究竟買咗乜嘢迷債產品，大舊石仲分分鐘要畀立法會同僚照肺。

所以話呢，大舊石點止係惹火尤物，依家已經火燒身，煲呔曾一日未出嚟向公眾交代清楚，大舊石隨時焚身以火呀！