小白觀點：港版阿扁好行夾唔送

曾蔭權外遊，隔籬豪伯唔抵得又話要飛，酸溜溜咁問煲呔曾去邊玩，我話十成係去日本啦，原來真係冇估錯，佢的確溜咗去北海道，喺小樽畀寒風吹得兩吹，仲唔直把扶桑作祖國咩！

有日經過報攤，有個外國女人見到煲呔曾上晒報紙頭版，問呢個麻甩佬係咪叫「Ah-Bian」，小白老弟不禁五體投地，大呼「same same」兼直豎拇指讚佢眼光獨到。所以呢，煲呔曾反正留喺香港好似過街老鼠咁，不如刺激吓日本消費好過啦。

豪伯呀豪伯，人哋煲呔曾身嬌肉貴去日本夢會小澤瑪利亞，豪伯你就寒寒酸酸去同「菲律賓黃容根」埃斯特拉達打招呼，同人唔同命，唔恨得咁多o架喇！

網友觀點......

貓咪

一有事就逃避，日本可能係佢嘅藏身之地呢！

大長今

佢就好啦，成日有得遊埠，我連去離島都冇錢呀。

MM

呢份工真係易做，有嘢就閃，不過如果唔返嚟仲好，香港經濟一定再起飛！

小武

唔知今次係咪又同成班真朋友、好兄弟去呢？

網址：www.sunsiupak.blogspot.com

阿豪觀點：搵老友麻生太郎敍舊？

煲呔曾居然喺呢個時候仲有閒情逸致去日本旅行，真係令人嘆為觀止。大佬呀，莫講話佢家陣醜聞纏身，欠市民一個交代啦，就算冇事冇幹，係咪都好應該留喺香港，了解吓市民大眾對佢份施政報告嘅反應呢？

煲呔曾冇公布喺日本嘅行程，但係豪伯估計佢可能同佢嘅好朋友、前首相麻生太郎敍敍舊。麻生前排叫冇錢嘅日本後生仔女「慳啲使」，冇錢就唔好學人結婚，否則唔會得到人尊重，煲呔曾唔知係咪從中獲得靈感，竟然叫買唔起樓嘅中產搬入偏遠細單位，兩位仁兄一樣咁涼薄，仲話唔係好朋友？呀，係嘞，唔知煲呔曾會唔會學埋麻生咁落台，以進一步加深彼此友誼呢？

網友觀點......

怪力亂神

啱o架喇，去耐啲啦，最好去咗唔好返嚟，反正冇佢喺度，香港一樣run得咁順，分分鐘仲好添！

尖子

煲呔曾反正都係捱日子等收工o架啦，肯定之後仲有大把機會周遊列國歎世界……

peter pan

泰山崩於前而面不改容，呢啲咪就係政治家風範囉……

大卜

乜曾蔭權去咗旅行咩？點解好似完全唔覺嘅？係咪因為佢就算喺香港都係龜縮，所以唔覺呢？

網址：www.lukchiho.blogspot.com