港府尋日又搞新意思,宣布委任前入境處長黎棟國做保安局副局長,民政事務總署副署長黃靜文做政制及內地事務局副局長。奇就奇在,煲呔曾施政報告對副局長提都冇提,呢次打孖上請兩個,唔通想博一鋪,製造新話題轉移視線玩自救?
計太一叮話齋,煲呔曾移形換影嘅算盤未必打得響,而且極可能玩出火,令港人更加反感,解困唔成變捉蟲。係人都知副局長同政治助理只不過係煲呔曾借「擴大問責制」個名招攬嘅「曾家軍」,除咗醜聞一籮籮,其他方面毫無建樹,呢班政治新貴已經變咗政壇僭建物,成為港府嘅政治包袱。依家僭建物危危乎,港府唔去拆不特止,仲要加建,正一係唔衰攞嚟衰。
叮!當局當初黑箱作業任命十七個副局政助,結果人未蒲頭已經因為薪酬同國籍問題搞到滿城風雨,鬧出八國聯軍治港嘅大笑話。呢次任命兩個新副局長,第一時間「聲明」佢哋冇外國居留權,仲明碼實價列明人工幾多,即係承認上次衰咗啦。
港府話,請副局政助係為咗加強政治問責制,至弊納稅人一年使七千幾萬請返嚟嘅政治新貴,個個變晒隱形人,上任一年,認知率低到離譜。除咗涉及卡片當入息證明醜聞嘅商務及經濟發展局副局長蘇錦樑、涉及畢業禮風波嘅教育局副局長陳維安呢啲「風頭躉」,其他嗰啲幾乎冇人知道係乜誰。
佢哋做嘢變隱形人,講嘢就震騰騰,面對議員質詢,解釋政策嗰陣O晒嘴,唔係答錯就係做鵪鶉唔敢答,要勞煩坐喺隔籬嘅常秘幫拖解圍,副局長呢個位根本形同虛設。
同樣搞笑嘅係,煲呔曾話請副局政助係要培養政治人才,引入新思維,查實副局政助唔少都喺官場打滾多年,呢次請嘅兩個副局長都來自公務員系統,新嘅保安局副局長更加係退休後翻叮嘅前高官,而且五十有七,培養得嚟都夠鐘收工啦。
叮!社會上大把夠哥利、有經驗又後生嘅人才,煲呔曾咁多叻人唔請,偏偏要喺公務員圈子入面揀,同公務員自己做番有乜分別?咁嘅副局長請嚟簡直多餘,擺明又係搵納稅人笨。請嚟請去都係自己友,塘水滾塘魚,有乜新思維?當市民係三歲細路仔咩!
煲呔曾擴大問責制、培養政治人才係假,私相授受,玩政治酬庸益自己友就真。拿拿臨宣布任命,想救番隻慳電膽,呢啲笨賊招早就畀人睇穿,慳啲啦。叮!