小白觀點

熱狗巴士司機夠晒Man

九巴決定喺兩年後，全面淘汰冇冷氣嘅「熱狗巴士」，真係可惜。其實，我對冷氣巴士一啲好感都冇，有時冷氣開到凍到要着雪褸，有時焗到以為坐緊密不透風嘅偷運人蛇貨車。相反，熱狗巴士好處多囉，如果落雨天撞正個美少女坐喺隔籬，可以特登開少少窗等啲雨撇落佢塊面，唔理佢媽叉你，抑或哀求你閂窗都好，都算係打開咗話題吖嘛。

唔係講笑，小白老弟見過有個熱狗巴士司機，成個歌星Soler咁款㗎，由於架車熱得滯，制服已經變咗Deep V，佢右手揸住軚，左手起勢i腳，Man到呢！次次都有幾個師奶有位唔坐，企喺度睇到嗒晒糖。熱狗巴士真係充滿集體回憶！

網址：www.sunsiupak.blogspot.com

永　成：熱狗巴士應該要列入歷史保護文物啦，冇熱狗巴邊有冷氣巴呀！

burger王：其實坐熱狗巴士仲好過冷氣巴，空氣流通啲，病菌都冇咁易傳播，依家坐冷氣巴一定凍到病。

Kitty：秋涼坐熱狗巴士兜風真係件樂事，第時冇得坐點算呀，不如去信叫九巴擱置淘汰「熱狗巴士」啦。

小　豬：可能我肥仔啦，一定要坐冷氣巴，唔係就熱死。

阿豪觀點

少個選擇焗人搭貴車

巴士公司決定淘汰「熱狗巴士」，被人批評話係變相加車費逼人搭貴車。咁又難怪嘅，大家不妨留意吓啲巴士站吖，大把公公婆婆寧願等耐啲，都要坐架平啲嘅「熱狗巴士」。

或者巴士公司會咁講啦：我哋都係為大家好，天時暑熱畀架涼啲嘅車你哋坐，等你哋舒服啲唔好咩？但係細心諗吓又有問題喎，茶餐廳凍飲收貴啲，等人可以消吓暑舒服啲，但係都唔會話取消晒所有熱飲啩？仲有呀，有啲所謂「空調巴士」，根本同蒸籠冇乜分別，我夠坐得唔舒服啦，又唔見可以退番部分車費。

其實講到尾，作為消費者都係想多個選擇啫，都唔算太過分啫吓話？

網址：www.lukchiho.blogspot.com

勤　記：嘩，你鋪話法，你去揸熱狗巴吖笨，包你中暑呀！

沙膽權：淘汰晒熱狗巴士，起碼冇傳出阿邊個嘅邊個親戚係汽車冷氣代理商呀，算係咁㗎啦，收貨罷啦。

working class hero：交通費愈來愈貴，遲啲惟有搭叮叮至負擔得起咯！

周瘦娜：非冷氣巴士成為歷史陳迹，好懷念以前嗰啲車頭有個凹位嘅老爺巴士！應該整番個巴士博物館……