不過，出名長氣嘅勞工及福利局局長張建宗，就點都要死撐報告有協助打工仔嘅措施，佢尋日响立法會人力事務委員會介紹有關政策時，一開波就叫議員唔好睇小嗰短短幾行字，其實包含咗四個重要措施，更加用咗一啲「跳出框框」嘅做法。

何謂跳出框框呢？咪就係加開零售業招聘中心、利用手機短訊發招聘資訊、借搵工易終端機畀非政府機構，同埋响天水圍開一站式就業培訓中心，全部都係新瓶舊酒嘅措施。張局長仲話呢啲新橋由個局同兩個部門集思廣益出嚟，叫大家千祈唔好低估呢項創意，佢把口咁厲害，第時走去賣寶藥，肯定大把人落疊。