煲呔曾拉咗前政制及內地事務局副局長譚志源入特首辦做主任，尋日公布委任黃靜文接替譚志源嘅空缺。政制及內地事務局局長「林公公」林瑞麟一直被批評為「人肉錄音機」，講嘢重重複複又冇料到，喺尋日嘅記者會上，有記者問黃靜文同「人肉錄音機」會唔會夾得嚟。
本來係民政事務總署副署長嘅黃靜文，外貌討好，講說話有民政事務局傳統嘅圓滑，佢話林公公資深、有經驗、肯承擔，佢自己就外向、鍾意同人溝通、有乜事無論做得到或者做唔到，都會坦誠解釋。黃副局長首次「考試」，答問得體，四平八穩，不過佢咁講，好容易令人聯想起林公公嘅特點：自閉、唔鍾意同人溝通、唔會坦誠解釋—咪就係成部人肉錄音機囉！
比起一年幾前副局長同政治助理「出場」時嘅混亂，特區政府好明顯吸取咗深刻教訓，公布委任黃靜文新職位同委任黎棟國做保安局副局長嘅新聞稿，就已清楚講明兩人月薪有幾多同點計出嚟，黃靜文本身有居英權，亦都係事先放棄咗，證明經一事，長一智，係有道理嘅。