本文重點
篤篤篤撐，華仁戲劇社只演兩場嘅《鴉雀如何作鳳凰》尋晚終於開鑼。華仁戲劇社嘅英語粵劇原來有成六十幾年歷史，但就唔係年年搞，對上嗰次係前年，今年演嘅係以戰國時期為背景嘅曲目。不過國王呢個角色呢，多年嚟都係由華仁戲劇社主席、英語粵劇創始人、身兼翻譯兼導演嘅退休高官黃星華哥哥黃展華擔任，但今年就首次改由一出道就做大官嘅劇社台柱陳祖澤（John）撈埋，由高官「升呢」封王，阿John今鋪都算巴閉嘞。
肥胡太監變丞相
其實個個華仁仔嘅角色都係由低做起，好似負責主禮嘅孫明揚就由小兵做起，而由「大勢已去」嘅小太監開始做起嘅「肥胡」胡定旭，今日咪一樣做到丞相，連佢自己都搞笑話醫學昌明無有怕。講真大家嘅目標都係要幫學校籌多啲善款，所以都唔會計較做咩角色。
除咗舊生之外，華仁家眷亦都好支持，好似胡郭秀萍咁，佢老公胡應湘同仔仔胡文新都係華仁優良出品，雖然佢唔係粵曲發燒友，但都一樣好支持，但係有老婆幫手嘅胡生就話自己一定唔會粉墨登場，怕開聲會趕客，都係捐錢最實際。有人出力有人出錢，唔怪之得輕易就籌到四百萬啦。