雖然立法會新一年度工作啱啱先拉開序幕，但年來一直傳出組黨消息嘅經濟動力已經好活躍，行會方面有發叔劉皇發搏到盡、幫政府打高鐵呢場仗；立法會方面，梁君彥日前又代北上打工仔同商人揚聲，要求港府向內地反映修改逗留一百八十三日就要雙重徵稅嘅規定，呢個議題備受關注，經濟動力食住呢條水，一定可以爭取到唔少跨境打工仔同商人支持。
立法會雖然啱啱復會，經濟動力已經一副搏殺格，頻頻吹風講工作大計，有政圈中人話，日前被指為煲呔曾「曾朋友」飯局嘅嘉賓中，經濟動力嘅林健鋒同梁劉柔芬都有份，足見佢哋同政府高層關係幾咁密切。而且行會有發叔發功，立法會方面又穩佔四票，呢個組織嘅政治能量似乎愈來愈強。
不過，政治團體嘅實力唔可以淨係靠人脈，所以經濟動力喺立會首次大會已經提出質詢，針對跨境打工仔嘅雙重徵稅問題入手，依家內地規定工作滿一百八十三日就要喺內地納稅，對本港跨境打工仔嚟講簡直係緊箍咒，經濟動力關注係好事。無論今次爭取成功與否，佢哋都可以食住呢條水，主打跨境打工仔權益，依家內地同香港融合日深，呢類問題一定愈嚟愈多，佢哋搶閘關注跨境打工仔權益，不失為進可攻、退可守。