信封用量倍增唔環保

行管會最新帳目顯示，截至今年三月底，立法會開支較舊年增加咗一成二，其中一般開支增加咗一成半，立法會雖然推行環保措施多時，上個年度用紙量卻增加咗一成八，信封用量更加倍增百分之一百一十三，係近五年嚟首次上升。

點解議會忽然唔環保呢？罪魁禍首就係雷曼迷債同梁展文事件兩項專責調查累立法會做咗樹木殺手。因為兩個委員會都可引用《立法會（權力及特權）條例》，形同法庭審訊，委員會涉及嘅所有資料文件都要印晒畀被傳召嘅證人參考，當中包括唔少機密文件，必須用信封小心袋好，自然搞到紙張同信封用量激增，所以兩個委員會嘅主席何鍾泰同李鳳英想慳啲都唔得。

其實，呢個帳目只係反映三月尾之前嘅情況，家吓梁展文事件嘅調查已近尾聲，雷曼事件嘅調查預計亦會喺本年度內查完，不過立法會已預先張揚或會加多場甘乃威事件調查，估計嚟緊一年立法會仲會再成立其他專責委員會，想慳家真係難啦！

再睇遠啲，立法會兩年之後就會搬往位於添馬艦嘅新大樓，新大樓比舊大樓面積多三點七倍，正所謂一闊三大，到時燈油火蠟都會用多啲啦，立法會講環保，睇怕都係得把口啫，唔好愈講愈大使已經好嘞。