因為愛冒險，所以前港區全國人大代表朱幼麟有個花名叫「飛天朱」，尤其鍾意「飛天」玩跳降落傘，佢早前又有創舉，就係帶寵物跳傘，被佢選中一齊飛天嘅就係養咗七年嘅愛犬波波。飛天朱話帶動物跳傘佢算係香港史上第一人，幾年前已構思呢個創舉，純粹為Enjoy，尋求刺激。為咗呢十幾分鐘嘅興奮，佢一年前已開始訓練波波，成日帶佢上山望番落嚟，等佢習慣唔怕高，跟住訓練佢點樣企定定，仲要用幾百蚊美金喺美國買件特製狗衫返嚟做裝備。
今次佢揀喺香港石澳表演，搵埋朋友空中同遊兼幫手影低呢幕歷史一刻，相中所見，佢同波波悠然自得，呢對主僕組合果然合拍。佢話波波成二十磅重，所以控制降落傘難度高咗好多，可停留喺空中嘅時間亦短咗，本來考慮過帶小豬上天，但豬嘅腳係尖嘅，好難企得定喺佢大髀上面，所以造就狗女波波成為空中陪遊佳麗，今年秋天佢會再帶另一隻愛犬「Sugar」飛天。