正當一眾高官絞盡腦汁諗計，為煲呔曾藉施政報告推慳電膽涉嫌利益輸送益親家開脫之際，一直被指係煲呔曾嘅「真兄弟」嘅財爺鬍鬚曾多日嚟都冇幫口，尋日喺成千字嘅網誌中，竟然冇提及呢件事，仲有閒情逸致去講家中嘅寵物。
鬍鬚曾成篇網誌淨係介紹曾家嘅養狗歷史同趣事，鬍鬚曾話自己養咗三隻狗，感謝卡嘅主角Oliver係佢舊年送畀個女嘅生日禮物，另外，佢喺美國波士頓住嘅時候，又曾經養過兩隻分別叫Cheshire同Cherry嘅鬆獅犬，不過搬返香港之後，兩隻鬆獅犬就留咗畀佢細佬照顧。
近來因病得福嘅佢，通波仔死過翻生之後民望大升，唔知佢係咪驚出面力撐煲呔曾，會搞到自己衰埋一份，寧願封口。其實，佢大病初愈，絕對大條道理可不問世事匿喺屋企，閂埋門玩狗兼休養，之不過，佢一副事不關己、翹埋雙手嘅態度，正凸顯問責制下，管治班子各家自掃門前雪嘅心態。令人不禁要問：呢個係乜嘢團隊呀？