早前建國六十周年慶典上，前總理李鵬孫女蘭蘭都有曝光。外貌標致且身形高挑嘅蘭蘭拍住媽媽、「中國女電王」李小琳亮相，咁啱畀全國政協委員兼美容天后鄭明明撞到。雖則明明姐同小琳係閨中密友，經常結伴行街扮靚，但佢話都係首次見到蘭蘭真人，事關有九級鋼琴底子嘅蘭蘭早年喺英國留學，近年至返上海深造咋。
蘭蘭嘅面形輪廓、皮膚、身形同眼神都似足媽媽，簡直係李小琳嘅「複製人」。蘭蘭影相時叉腰擺甫士，型格十足，難怪明明姐話佢有晒做名模嘅潛質。明明姐近年喺內地營商有道，而喺香港嘅投資一樣報捷。早前斥資七千多萬元購入尖沙咀三個天價豪宅單位，持貨個幾月，已升值唔少。
