政府下個月就會推出新嘅政改方案做公眾諮詢，呢件富爭議性嘅事本身已綁滿炸彈，前排仲爆出煲呔曾明益親家嘅慳電膽風波，令呢份政改方案嘅「前途」更加唔明朗。負責撰寫方案同做推銷員嘅，當然係泛民主派首席箭靶嘅政制及內地事務局局長「林公公」林瑞麟，睇怕亦會因慳電膽而受多幾支箭。
林公公尋日出席一個慈善步行活動，喺烈日當空下，冇水冇帽冇黑超，都有啲擔心佢中暑，點知佢話呢段路一啲都難佢唔到喎，皆因佢讀中學嘅時候係運動健將，既係羽毛球校隊主將，又係學校嘅田徑校隊隊員，負責跑四百米同千五米長跑，所以行少少路對佢嚟講只係濕濕碎。
見佢講自己體育威水史嗰陣一臉自信，真係好似將軍臨上場打仗個樣咁。佢又話已經準備好推出政改方案，會盡力爭取各方面嘅支持，睇嚟佢已經準備好接泛民嘅扣殺，就算唔夠力擋都唔緊要，事關佢長跑咁叻，打唔贏都可以同佢哋鬥長氣。
之不過，呢啲都係好幾十年前嘅事，正所謂日久生疏，因住頂唔住要戴氧氣罩喎！睇怕佢都係練定氣先嘞！