肥仔張講起孫仔就甜到漏，佢太太已第一時間飛去陪囡囡坐月，但太太嫌佢阻頭阻勢，唔畀佢去，加上施政報告出台，火頭特別多，諗諗吓都係行唔開，留喺香港坐鎮。但囡囡同身為醫生嘅女婿好識做，每日透過視像會議將孫仔嘅一舉一動傳送畀千里之外嘅佢，等佢望孫止渴。咁孫仔似邊個呢？佢話暫時未知，但睇見孫仔首次睜開眼仔，感覺好趣致，遲啲冇咁忙佢定會飛去美國學吓餵奶湊孫。查實保安局局長李少光近排都抱孫，仲話會幫孫仔改名，咁肥仔張呢？佢即刻耍手擰頭，話晒係外孫，改乜名唔輪到佢話事喎。