兩間華仁書院尋日聯合搞咗個校慶慈善步行，由九龍華仁行去香港華仁，中間搭天星小輪過海，唔少政商界嘅名校友都有出席，包括教育局局長孫明揚、醫管局主席肥胡胡定旭同合和太子爺胡文新等。
其中一個中途離隊嘅肥胡，行咗無耐就急急腳上車。喂！唔夠氣呀？八下先知，原來佢返咗香港華仁排戲。
華仁戲劇社喺今個星期四、五搞咗兩場英文大戲，為咗重建校舍籌款，套戲叫《鴉雀如果作鳳凰》，係講吳越爭霸嘅故事，肥胡係喺戲入面做吳國嘅丞相嘞。
雖然今次唔係肥胡首次做英文大戲，但佢就有啲擔心，皆因佢係大近視，又唔慣戴隱形眼鏡，喺台上冇得戴眼鏡，曾經差啲跣親，所以一個丞相用嘅fing腳動作，佢就私下練咗好多次，務求以最佳表現示人喎。