雖然事件爆出後，煲呔曾仲講到自己同家人係受害者咁款，而環境局局長邱騰華就一於攬晒上身，喺立法會解畫時話建議係環境局提出，責無旁貸，但班議員唔肯收貨，事件發展至今，不但止未能平息風波，仲愈燒愈烈，愈揭愈醜咁。

邱騰華尋日喺大氣電波繼續推介慳電膽現金券，又話唔會偏幫某一個慳電膽代理商嘅，但解畫還解畫，當然避唔過佢老闆煲呔曾單嘢。其實，喺整個節目過程中，每當主持人講到煲呔曾親家或姻親呢個字眼，邱騰華不期然就笑幾聲，直至主持人直接問到喺呢件事上，究竟係佢累煲呔曾，定係煲呔曾累佢？佢先笑三聲，跟住有半秒答唔上，先吐出「都唔可以咁講嘅」。

死撐爭議係教育一部分

睇邱騰華嘅反應，好明顯係以笑遮醜啦！試問吓，事件發展至今，廉署都要調查，亦唔知會點收科，唔通佢可以推翻之前嘅說話，話唔關佢事咩？

跟住佢仲話推慳電膽嘅目標同方向係好清晰，就係為咗節能同減排，令到香港變成綠色城市，而推行任何一項環保政策，都會涉及唔同嘅界別，就會有唔同嘅睇法。

開始耍官腔，主持人於是兜番轉頭，問佢喺呢件事上有冇困擾？佢話好多環保議題都有爭議，亦可能係公眾教育嘅一部分，透過呢啲討論未必唔係好事，事關依家好多人都明白到慳電膽同鎢絲膽差別咁大，水銀係可以回收嘅，所以凡事向好方面去睇，政策推行都容易一啲。

吓！咁都得？反映出邱騰華除咗識得以笑遮醜之外，仲好阿Ｑ。之不過，若果要借爆出涉嫌輸送利益醜聞嚟令到公眾了解慳電膽同鎢絲膽嘅分別，咁之後政府係咪都去靠呢啲醜聞去推銷政策，咁仲得了？