小白觀點

公院醫生罷工仲好

領匯加租勢兇夾狼，唔單止賣糧油雜貨嘅小商戶捱唔住，連屋邨西醫都一樣頂唔順要絕地反擊，準備發起罷診對抗領匯。算罷啦，呢隻大怪物點會咁容易讓步吖，話唔定，當局又話要為咗公眾利益，將屋邨西醫變晒做公立診所，將派錯藥、打錯針呢啲優良傳統融入社區，咁咪仲累得人多？

所以小白老弟絕對唔贊同屋邨西醫搞罷診，但對於公立醫院醫護人員齊齊罷工呢？就舉腳支持！因為公立醫院醫生好多直踩幾廿個鐘未瞓過，趁呢個機會抖番一兩日，養足精神都好應該。再講，據講加拿大試過有醫生大罷工，病人嘅死亡率反而大降低，咁先至叫優勢醫療產業吖嘛。

網友觀點

佳八：領匯真係食人唔吐骨，不斷加價，畀壓力佢就咁啦！

Pooh：不如群起對抗啦，全部商舖限定時間關門，誓抗領匯！

子晴：經濟差仲不斷加租，政府搵領匯返嚟，係咪靠害吖！

joanna：連醫生都頂唔住領匯加租，你話佢加得幾勁，其他小生意舖仲慘呀！

網址：www.sunsiupak.blogspot.com

阿豪觀點

領匯變咗羅禮士細佬

領匯真係厲害，竟然有本事搞到醫生都搞罷診抗爭，有西醫工會組織反映，過去一年有唔少公屋西醫因為領匯大幅加租兩至三倍，頂唔順之下惟有提早退休。

其實領匯咁做，咪又係想招攬連鎖大集團呢一類高質素租戶！但係恐怕領匯打錯如意算盤啦，佢哋乜嘢商戶都可以蝦，係唔可以蝦醫生嘅。大家諗吓，冇晒屋邨西醫聽診，你話邨民有咩傷風咳嗽頭暈身㷫起上嚟可以去邊度睇醫生呀？咪又係去睇政府門診，邨民喺唔病死都排隊排死嘅情況下，相信好多有小病都由得佢，到時佢哋係咁喺商場播菌，搞到成個商場生人勿近，最終領匯咪又係變咗羅禮士個細佬—羅禮瑞（攞嚟衰）！

網友觀點

勤：以後領匯轄下的商場，全部賣慳電膽，確保領匯前途光明！

小卜：仲要係唔畀小商戶賣，要大集團賣先得！

客迭：領匯真係離晒譜，又刻薄員工，又趕走晒啲小商戶，究竟政府去咗邊呀？

男人最痛：唔去睇屋邨醫生可以點？去公立醫院排餐懵，唔通真係要自插兩刀去急症室即刻有醫生睇咩？

網址：www.lukchiho.blogspot.com