一者，住戶可獲派一百元慳電膽現金券，用電量大得多的商戶居然無福消受。

二者，現金券並非純屬贈券，兩間電力公司會將涉款金額二億四千萬元撥入經營費用帳。即是說，羊毛出在羊身上，電費有可能加價，人人受害之餘，傷口最深的是沒有獲贈現金券的商戶。

三者，萬一，慳電膽真的發揮神奇作用，用電量果然大幅下降，電力公司又可以根據利潤管制協議申請加價。換言之，即使慳電救地球，不能慳錢救老竇。

講來講去，就是電力公司賺到盡。你用傳統鎢絲燈浪費電力固然好，你愈浪費，他愈富貴；你死慳死抵轉用慳電膽亦是無妨，因為特區政府提供世所罕見的包賺不賠利潤保證，利潤比率按資產計算，投資愈多利潤愈大。這就等於說，假設全港用電量劇減九成，電力公司有權要求瘋狂加價九倍來彌補損失。

你熱愛地球嗎？你支持環保嗎？你節約用電嗎？行，請你乖乖坐定定，千萬不要兩頭擰，一方面接受特區政府搵你笨，另方面接受電力公司攞你膽。

在如此慳電愈多電費愈貴的荒謬大前提之下，試問誰還有興趣跟你玩尋回藍天白雲的昂貴遊戲？

送你慳電膽，搵笨夾攞膽，煲呔當你係傻蛋！