醜聞曝光後，煲呔曾唔認衰，仲死撐話事件唔涉及利益衝突，佢仲話制訂施政報告唯一嘅原則同宗旨係考慮公眾利益。不過，當被問及有冇向行政會議申報時，佢就支支吾吾，語焉不詳，擺明心中有鬼喇。

有學者批評煲呔曾政治敏感度唔夠、唔識避嫌；有政黨要求佢清楚交代事件；有議員批評佢申報冇做到高透明度。連一向撐政府嘅保皇黨都唔敢幫拖，話高官應該做多一步，避免任何嫌疑，仲話事件本來應該處理得更好。眾叛親離，四面楚歌，煲呔曾呢次睇嚟有排頭痕。

查實，施政報告一出爐，市民已經抓晒頭，冇糖派早就預咗，但點都諗唔到政府派慳電膽，咁有「創意」，查遍古今中外嘅歷史，煲呔曾絕對係世界第一人。紓解民困派錢派米就聽得多啫，唔通望住個慳電膽就會飽？就算要推動環保都有大把嘢派喇，派環保袋又得，派手巾仔又得，咁多嘢唔揀，偏偏選中慳電膽，如果話當中冇蠱惑，細路仔都唔信喇！

叮！難為煲呔曾自吹係政治家，喺官場打滾咗幾十年，居然唔知乜嘢叫嚴以律己，甚至連瓜田李下咁簡單嘅道理都唔知，你話奇唔奇吖。不過咁，一樣米養百樣人，世界上有好多種人，有人真傻，有人扮傻，有人真唔知，有人扮唔知，究竟煲呔曾係邊種人，只有佢自己最清楚。

環境局局長邱騰華都算唔話得，居然自動獻身，聲稱慳電膽現金券計劃全部係環境局建議嘅。唉，做細嘅護主心切，想幫老闆孭咗呢隻鑊，可以理解，問題係，施政報告係由煲呔曾制訂，而且係由佢宣讀，對政府決策負有最後責任，如果咁都唔關佢事，就真係天下奇聞喇。何況慳電膽計劃涉及二億幾元，今次搞到咁大劑，邱局長就算想護主，都孭唔起呢隻鑊喇！

講番轉頭，就當煲呔曾真係唔知乜嘢叫做瓜田李下，但前財政司司長梁錦松當年喺發表預算案之前偷步買車，同樣冇申報利益，卒之搞到要落台，呢件事煲呔曾知道嘞啩。

大家仲記得，當年立法會對梁錦松事件緊咬唔放，窮追猛打，今次都唔可以例外o架，一於查個水落石出，任何人都唔好放過吖！