小白觀點：「家奴邱」護主可敬

兩家電力公司派一百蚊慳電膽現金券，奀過長者醫療券，遲啲仲可能要加電費補數添，認真搵笨！最搞笑嘅係，依家煲呔曾畀人踢爆佢親家係做代理慳電膽生意，有冇利益衝突？梗係冇啦！煲呔曾唔再用官場口頭禪「商業決定」，而用回歸以嚟難得一聽嘅「公眾利益」解畫，單係呢四個字已經擲地有聲，小市民多謝都嚟唔切啦。

再講吖，煲呔曾嘅真兄弟邱騰華真係唔話得，立刻仆出嚟護主，將成件事攬晒上身，喺「人情似紙張張薄」嘅年頭，確係難得。如果驗過DNA證明佢兩兄弟冇親戚關係，應該喺環保大道豎立一孖「當奴曾與家奴邱」銅像，表揚香港打工仔嘅核心價值。

網友觀點......

阿松

呢單嘢真係愈挖愈出X呀，好心啦，仲有些少廉恥嘅，快啲辭職啦！

古田任三郎

有冇搞錯呀，把口話係為環保，竟然又印埋咁多紙本券，又唔知要鋸幾多棵樹啦。

BT憎

望吓個天啦，唔該！搞環保喎！

LEE

我屋企用緊光管，唔知有冇受惠呢？

網址：www.sunsiupak.blogspot.com

阿豪觀點：呢頭慳電嗰頭嘥紙

煲呔曾成份施政報告最實牙實齒嘅，竟然係嗰一百蚊慳電膽現金券，吹脹！

最好笑嘅係，雖然慳電膽節省電力，但電力公司可能根據利潤管制協議加電費；二來竟然用紙印現金券出嚟。大佬呀！長者醫療券都電腦化啦，你仲喺度濫伐樹木，咁唔環保㗎！

不過依家環唔環保都冇所謂啦，大家一早已經將焦點放晒喺疑似利益輸送事件上面，如果我係煲呔曾嘅話，一定會將計就計，咁樣同市民交代：「呢件事話畀大家聽，其實環保同商業並冇矛盾，一樣可以大把商機！」跟手乘勢喺本港大學開設更多同環保有關嘅學位課程，咁到時咪可以一次過惠及教育同環保呢兩個「優勢產業」囉！

網友觀點......

卜勤仔

可能係長者識上網，但係交電費啲家庭，佢哋班細路冇錢上網啩，哈哈哈！

搞錯呀，我係真卜勤

終於明白施政報告做乜提出「開心家庭」計劃，原來醒燈膽親家，「開心第一家庭」。

燈膽王

係囉，有利益唔好嘥，咪正正係環保嘅最高精粹囉……

傻仔

電動車夠環保啦，又唔見推出現金券資助市民買電動車！