四叔話，大家唔可以用七萬蚊呎價作準則，因為家吓兩至三萬蚊一呎都可以買到豪宅。至於近排樓市熱潮，係因為本港取消咗遺產稅，又歡迎內地人來港投資，所以有啲內地豪客貴一貴都買嚟投資，令人心理上覺得整體樓價貴咗。至於豪宅呎價係咪見頂，四叔不假思索就話：「係咁上下，啱㗎喇！」

李家誠唔捨得買

佢仲話，家吓本港中價樓同九七年高峰期比較，唔算好貴。講到煲呔曾叫人買偏遠嘅新界樓，四叔話：「新界地、新界樓最多係我哋！」有冇呎價低過四千蚊呢？佢話：「二千蚊一呎都有，去天水圍買囉，有平有貴任你揀！」

講番佢哋嘅天價樓盤港島半山干德道「天匯」，據聞四叔愛兒李家誠有意買番個單位嚟住，四叔就澄清：「佢（家誠）嗰個單位仲靚，咁貴佢唔捨得買！」會唔會打個折頭畀家誠呀？「我都唔知佢想點，都係唔捨得買㗎喇！」