17/10/2009

播放本新聞相關短片

政情:乜都關佢事林鄭打到殘

施政報告公布後,發展局局長林鄭月娥幾乎日日都喺電視機出現,唔係記者會就係推介會,好似變身施政報告嘅代言人咁,市民只係睇到港府三司十二局只得一個林鄭月娥。呢個本來係攞分嘅機會,但官場人士就話,呢本「群策創新天」嘅報告重頭戲全部集中喺發展局,焗住林鄭孭香港未來十年八年嘅重大計劃於一身,呢份差事嘅驚險程度可媲美肥姐踩雞蛋,需要步步為營,叉錯腳更好大鑊添。

官場向來有慣例,施政報告公布後由相關政策局局長上立法會、開記者招待會解釋新猷,所以呢段時間應該係百官爭鳴嘅,可惜過去兩日只係得個林鄭兩頭騰,一日嗌「快、準、狠」,一日就畀人柴台話政府搞活化太遲、拆政府總部西座唔環保、中環街市空置時間過長等。

尋日立法會招呼一眾政府高官食飯,林鄭貴人事忙梗係冇份啦,難怪尋日見佢喺推介會都有啲疲態,做到謝謝哋。「打得」呢頂帽睇嚟真係戴唔過,林鄭本身已經掌管超級大局,家吓仲要孭埋中環發展、活化工廈甚至六大產業中私家醫院同私立大學嘅撥地等,官商勾結、唔環保,甚至唔珍惜市民集體回憶嘅指控,實會排山倒海而嚟,呢條路真難行!