中文大學校董會再添新人選，繼主席由舊生同將任滙豐中國董事長嘅鄭海泉出任後，尋日政府又委任同樣係舊生嘅冠軍科技集團主席簡文樂（Paul）入局，任期由下個月二十七號起，為期三年。中大校董會已經有唔少舊生，今次又添一員，要搞校董舊生俱樂部真係話都冇咁易。
阿Paul雖然係科技人，但醉心佛教藝術同文化，早排攞咗自己珍藏嘅二百一十六件菩薩尊像出嚟搞展覽，當時已經話對家吓社會道德淪喪、商人貪快牟財嘅現象好痛心，希望教化人心。今次佢返母校做埋教育，會唔會趁機推廣多啲德育呢？
唔講唔知，阿Paul都係中大MBA舊生，佢間上市公司亦好鍾意請中大人，舊年中大有個校友賽馬日同校友會聯會盃，佢仲有份出錢贊助添。今次做埋校董會，同中大嘅關係實會更加密切。