今年係好年，政圈喜事一件接一件。民政事務局局長政治助理徐英偉（Caspar）尋日小登科，同劍橋才女女友Leslie拉埋天窗，佢哋喺尖沙咀洲際酒店註冊，筵開四十圍，叫晒親朋好友、政府同僚嚟沾吓佢哋嘅喜氣，場面都幾熱鬧。
Caspar同Leslie係喺加拿大滙豐銀行做嘢時認識，拍咗拖好多年，問佢婚後會唔會生三個，Caspar笑笑口唔回應，望住老婆嘅眼神卻格外甜蜜。不過，小登科之後，Caspar今日仲要返工，到月尾先有假陪老婆度蜜月，兩個人暫定去泰國玩。
唔知係咪政府有危機要處理，尋晚去飲嘅高官唔算多，就連Caspar嘅頂頭上司、民政事務局局長曾德成同副局長許曉暉都冇到。有份捧場嘅包括升職冇耐嘅特首辦主任譚志源、食物及衞生局副局長梁卓偉、民政事務總署署長陳甘美華、前康文署署長周達明，同政制及內地事務局局長林瑞麟等。