講起驗身，好多人都記得有個嗌人「年年驗身」嘅廣告，早排急性心臟病入院嘅鬍鬚曾復出之後，尋日首次出席一個飲食場合，見佢四圍走，仲飲咗四分之一杯紅酒添。好多議員問起佢嘅身體狀況，佢自爆年年有驗身，但因血糖同膽固醇都冇超標，所以從來冇諗過要驗心臟。原來佢年年驗身都驗漏最緊要嗰瓣，真係唔知話佢好彩定話佢大懵好囉。
病愈復出嘅鬍鬚曾尋日飲咗四分之一杯紅酒後，仲想再飲，但有議員怕佢出事，擋住唔畀佢再飲。鬍鬚曾酒後吐心聲，慨嘆一個人睇嚟健康，但絕唔代表冇病，即使年年驗身，都好可能有疏漏。
佢大病初愈冇耐，就輪到司機病咗。尋日下晝三點半，財爺部座駕竟然喺律敦治醫院出現，睇真啲，原來係佢嘅司機睇醫生，呢位司機仲解釋話，唔舒服嗰個係佢而已，叫大家咪多心喎。