社民連立法會議員「長毛」梁國雄前日喺特首答問大會期間違規被逐出議事廳，糾纏間搞到一個保安員受傷，呢個保安員當時即刻送院檢驗。立法會秘書長吳文華尋日喺內會上報告，個保安員傷勢嚴重，撞傷咗腰部、韌帶移咗位、手部皮肉被扯甩，經治療後醫生指示要休息五日。
議事廳有人受傷梗係受關注啦，立法會秘書處已聯同議員送一張幾乎半個人咁高嘅巨型慰問卡問候，工聯會王國興尋日喺會上質疑主席當日點解冇即時報警處理，等有關保安員報工傷，對事件好遺憾。
二十個泛民議員尋日發聲明，輕描淡寫咁話期望以後唔會再有類似事件發生，社民連尋晚更振振有辭咁話，保安員將長毛強行拖出立法會，因通道狹窄至無可避免發生意外，又指摘白鴿黨張文光對抗議行動作出不合理批評。個保安員無辜受傷，泛民竟然咁冷漠，市民真係心都冷啦。