17/10/2009

播放本新聞相關短片

政情:煲呔曾猛騷養錦鯉心得

新一份施政報告劣評如潮,窮困基層畀人當透明,連唯一被視為派糖嘅一百蚊慳電膽現金券都被揭發係煲呔曾涉嫌益親家嘅招數,香港人真係嬲到有氣冇碇出,惟有喺民意調查中話畀佢知呢份施政報告係歷來最差嘅。不過,面皮夠厚嘅煲呔曾費事理你,尋日出席立法會飯局時,仲大講食經同養錦鯉嘅心得。

嫌香港水質唔夠靚

煲呔曾尋日出席立法會嘅飯局,同席有慳電膽現金券事件中孭咗鑊嘅環境局局長邱騰華、公文袋陳淑莊、富貴黨張宇人同工聯會黃國健等人,佢哋大啖「金腿蒸斑球」、「瑤柱海皇羹」時,煲呔曾好似唔滿足咁,仲要講中豬邊度好食、潮州菜上海菜邊度最耍家等,恍如獵食者上身。

講完美食之後,佢又講養錦鯉經。係人都知,佢個錦鯉池當年花咗納稅人三十萬,家吓個個月仲用緊公帑,煲呔曾又有乜嘢唔滿意呢?佢話,養錦鯉咁耐,發現好難養到好似日本錦鯉咁鮮色,唔知係咪本港啲水有問題。飯局中人有冇人覺得佢「玩物喪志」我哋就唔知,但一般市民肯定又嬲又激氣啦,到底煲呔曾呢個錦鯉名家知唔知有幾多市民連交水費都諗過度過,佢竟然嫌棄香港水質唔夠靚?

身為香港公僕,煲呔曾好應該為市民謀福祉,而唔係掛住為自己謀福利,成份施政報告扶貧交白卷,只係一味叫市民「睇遠啲」,轉過頭又「貼錢」畀親家,市民唔火滾都難啦!民怨燒到埋身,煲呔曾都懶理,仲要真人示範乜嘢叫講飲講食講玩,香港人,小心谷爆呀!