話時話，海洋公園都算有情有義，兩次延期加價。原定八月一日加價，見係暑假，小朋友放假，於是一推，諗住十月五日才加價，但善心一諗，照顧了香港未來的棟樑，冇理由唔照顧埋內地同胞，何況適逢中共建政六十周年兼「十一」黃金周，於是再推至十月九日才加價！這個延期，絕對是政治正確！

海洋公園都算唔話得，在樓價高升、股價叫好的時候，成人票價都係由二百零八元加到二百五十元，小童由一百零三元加到一百二十五元，加幅都係兩成啫，追唔上豪宅呎價啊！一家四口去暢遊海洋公園，大人兩位盛惠五百，兩條化骨龍二百五十，一張金牛有找！喺入面玩足一日，又睇國寶又睇海獅海豚表演，仲唔抵？

有道是：「風應節而變，雞時至而鳴。」即風應着節氣而改向，例如立春時吹東北風，叫條風；春分時吹東風，叫明庶風……海洋公園吹加風，叫海盜風！這「加甩髀」風永不失時，就像雞知旦而鳴，不會因為風雨如晦而不啼！海洋公園誠是本港十大信用企業，不會因為社會各方反對而不加價！

有人說，中國象棋的「將」、「帥」在王宮裏不出門，要靠他人保護；而西洋象棋的「王」、「后」則四處征戰。看來，海洋公園的管理層必定多是擅下西洋象棋的高手！「王」、「后」四處征戰，不加價何來糧餉？