唉，冇計喇，港府改善空氣質素，講就無敵，做就無力，氣候有乜法子唔暖化吖。環保署尋日搞咗個檢討空氣質素指標公眾諮詢會，點知幾乎變咗聲討大會。當局早前建議採用世衞中期目標一嘅標準，每立方米二氧化硫含量由三百五十微克收緊到一百二十五微克，畀環保團體踢爆目標定得太低，根本係自欺欺人。

學者篤爆，如果採用世衞中期目標二，本港空氣質素每年有近八十日超標，差唔多每四日就有一日烏煙瘴氣，你話幾得人驚吖。正如環保團體話齋，港府採用較低嘅標準，無非想「做好盤數」，唔使咁難睇啫。

叮！搞環保都弄虛作假，靠做數掩飾減排不力，港府呢招都算無賴咯。咁搞法，空氣質素根本冇可能改善，個天只會永遠灰蒙蒙，港府唔單止係「氣候逃犯」，仲係如假包換嘅「氣候騙子」添，為藍天打氣係假，將藍天打殘就真。

環保團體批評政府，雖然提出十九項改善空氣質素措施，但就冇提實施時間。真係搞笑，目標定得低唔在講，連幾時開始做、幾時落實都唔知，港府搞環保原來全部係齋噏，有冇誠意？心照啦！

叮！提起十九項改善空氣質素措施，真係把幾火，直頭好似封「打單信」咁，開口埋口離唔開個「錢」字。環境局局長邱騰華話到明，提升空氣質素，社會各界都要「共同付出代價」，電費可能加兩成、巴士車資可能加成半……總之，市民一係畀錢，一係繼續吸埋啲污濁空氣，而港府就關人個關，乜嘢承擔都冇。

嗱嗱嗱，港府今次又玩呢招嘞，尋日出席諮詢會嘅環境局常秘回應批評嗰陣話，政府出錢改善空氣，要考慮資源問題。擺到明閂晒後門，唔想作出承擔，繼續搵市民笨啦。

保護環境，人人有責。港府將改善空氣質素嘅責任卸晒畀市民不特止，最惡劣嘅係班高官仲帶頭破壞環保。佢哋啲專車引擎容量由三千到五千cc不等，全部係食油狂魔。架車cc愈高，耗油量同廢氣排放量愈多，高官自己就係空氣污染始作俑者，想港府提高空氣質素指標，咪即係問和尚借梳，盞嘥氣。

更搞笑嘅係，港府聲稱十九項減排措施可以令港人平均壽命延長一個月。空氣質素指標高低任佢哋噏，唔通港人平均壽命長短都由佢哋話事？如果係咁，港府不如順手將貧窮線降低到兩千蚊，到時香港點止冇空氣污染，仲冇晒窮人添。叮！