小白觀點：山寨食神應積口德

呢個年代阿豬阿狗都話自己係食神，小白老弟見過有個所謂食神，竟然將原隻鴨腎炒兩炒就上碟，節目主持連戲都懶得交，嚇到面都青，爭相走避唔肯放入口。

弊在好多網友都唔執輸，好學唔學，學埋啲吹水食神嘅尖酸刻薄嘢，喺自己個blog度寫寫埋埋好多食評，講到好似唔係人食咁。人哋打開門做生意，積番些少口德都好吖！

小白老弟喺度提醒大家，嘿，唔好以為好過癮呀，因住畀人告呀！台灣就有一個大學生喺網上留言，批評某食肆食物分量少、味道又差，立即畀人秋後算帳控告誹謗。真係抵佢死，希望香港嘅食肆有樣學樣，告到班山寨食神甩褲！

網友觀點......

蝦　碌

啲人寫blog寫到上天，自我中心到爆棚，畀人告，隨時告番轉頭啦，少擔心。

茂　伯

個個都認自己係才女才子食神，其他只係識食垃圾咁。

狼　牙

出街食飯，周圍起碼有七、八枱閃晒燈影相，以為影乜，咪又係影食物放上blog。

怪醫秦博士

依家去親街食飯，差唔多枱枱都有人影相啦，我啲friend嗰啲blog呀，有好多好多食評同埋相添。

網址：www.sunsiupak.blogspot.com

阿豪觀點：參考新聞寫作手法

台灣有大學生喺網上寫咗幾句食評，結果竟惹上官非，被批評嘅食肆入稟法庭告佢誹謗。香港一眾山寨食神立即人人自危，擔心此例一開，自己以後恐怕只能評論「皇家食堂」嘅食品矣。

惡意中傷當然唔啱啦，但係口味呢家嘢始終係主觀嘅，以後大家寫「碟嘢太鹹」嘅時候，到底會唔會畀人話「誹謗」呢？大家真係要認真諗吓喇。計豪伯話，以後寫網上「食評」嘅朋友，應該倣效新聞寫作手法，盡量避免用主觀判斷語，例如可以咁講：「在XXX吃了炒牛河一碟三分鐘後嘔吐大作，嘔吐物約三磅重；半小時後將同一碟牛河給家中小狗吃，小狗口吐白沫身亡，死因有待詳細科學調查……」

網友觀點......

Patrick Lai

我覺得起碼網上食評嘅參考價值，點都大過電視上啲飲食節目啦……邊有話所有食物都好味嘅啫？

尖　子

其實啲嘢好唔好食，始終都係好主觀嘅個人感受，咁都有得告嘅話，仲成世界嘅？

謝　康

不過網上寫食評啲人又係討厭嘅，一個二個扮晒專家咁，人哋開舖頭嗰啲，多得你唔少啦！

打到嚟

使唔使郁吓就告人呀？自己啲嘢整得好味，自然真金不怕洪爐火啦！

網址：www.lukchiho.blogspot.com