立法會新一屆會期仲有幾日就正式開始，最近各黨派都就十八個事務委員會嘅分工進行大執位，當中又以全新成立嘅「五散人」同經濟動力，以及黨團組成經歷巨變嘅工聯會同富貴黨變化最多。
另一方面，單打獨鬥嘅議員如葉劉淑儀，舊年已經入咗八個委員會，今年再下一城入埋工商委員會，成為加入最多事務委員會嘅議員；「大懶蟲」金融界李國寶就繼續懶理外界批評，只係入咗兩個委員會。
議員數目由原來七名大幅減少到三名嘅富貴黨，以及由富貴黨分裂出嚟嘅經濟動力，都會喺新一年重新分工，令到各成員嘅工作量以及關注點更加平均。例如富貴黨主席劉健儀咁，就加入咗經濟發展事務委員會，等方剛唔使得一支公撐住咁辛苦；經濟動力梁劉柔芬就會退出林健鋒同梁君彥都有加入嘅工商事務委員會，轉戰民政委員會撐劉皇發。