喺豬流感疫情通報中表現淡定嘅食物及衞生局副局長梁卓偉百足咁多爪，既有醫生專業，又係交響樂團嘅指揮，外貌老成持重嘅佢尋日出席一個活動時，不經意洩露咗自己只有三十六歲，雖然男人冇乜年齡嘅秘密，但佢嘅反差就好似《童夢奇緣》嘅主角咁，令好多人「O晒嘴」。
梁卓偉尋日出席香港盲人輔導會同執業眼科醫生會一齊舉辦嘅「青光眼No Way」活動，嘉賓通常都會做白老鼠，佢都應邀喺一個檢驗攤位前，檢查吓有冇青光眼。按照有關機構嘅規定，要報上年齡先可以驗有冇青光眼，梁卓偉細細聲講出歲數，「三十六」嘅字一出口，現場好多人都呆咗，好似唔相信咁，連幫佢輸入年齡資料嘅工作人員都有啲錯愕。
大家咁錯愕，一係梁卓偉嘅外形同年齡不相符，二係佢周身刀，玩音樂叻之外，又喺大學教過書，估唔到咁後生啫。梁卓偉喺醫學、音樂同教育都「玩」出名堂，家吓仲闖埋官場添，難怪大家畀呢個七十後（佢七三年出世）嘅副局長嚇親啦！