煲呔曾呢個禮拜就會發表施政報告，雖然佢之前高調做個諮詢會，又搵咗政黨、商界、學界人士反映佢哋嘅意見，但普羅市民對呢份快將出籠嘅報告卻冇乜大期望。社區組織協會主任何喜華尋日出席一個電台節目時，更以「三無」嚟形容煲呔曾，彈到佢一文不值。
何喜華早前已經喺另一個節目度狠批煲呔曾嘅施政報告，話佢幾年嚟一再對扶貧交白卷，政策冷漠兼涼薄；尋日佢仲明讚前特首有人情味，而被認為係「精仔」嘅煲呔曾，就對窮人漠不關心，完全無感情、無關心，亦無承擔，做所有事都係為咗個人民望，最好可以換走佢。
佢仲話，煲呔曾份人對基層咁冷漠，所以亦最憎社工。或者係咁，身為社工嘅何喜華先鬧得咁狠！