立法會禮拜三復會，好多復會準備工作都未完成，依家已經係十月中，照Eva嘅計劃，立法會必須喺未來一個月內完成工務小組同財委會撥款，政府先能夠開工兼招標。一個月之內要過工務小組同財委會，擺明當立法會兩大委員會係橡皮圖章啫！

黃成智尋日就話，政府家吓都未向立法會提交工程造價等文件，佢哋連高鐵要用幾多錢都唔知，政府係咪要立法會倉卒通過工程項目呢？咁樣做好唔負責任啫。亦有議員話，高鐵工程係影響未來幾十年嘅項目，呢輪社會上嘅討論好多元化，立法會需要多啲時間去處理，政府咪諗住可以蒙混過關。

造價走線皆有爭議

高鐵項目嘅造價同走線都有唔少爭議，富貴黨主席劉健儀尋日就話相信高鐵嘅造價唔會係外間盛傳嘅六百億元，但政府申請撥款時，立法會必然要小心審視係咪符合成本效益。至於走線方面，政府都似乎好驚陰溝裏翻船，尋日Eva遠赴荃灣向白鴿黨嘅李永達示好，高達透露Eva都擔心佢哋會支持由專業人士建議嘅另一個走線方案，希望佢哋唔好太快下決定，可見Eva已經提早做定游說工作。

不過，問題多籮籮，佢就嗌定年底開工嘅目標，好似逼立法會開會要快、撥款要快咁，財會主席架車由卿姐掌舵，問責官員先斬後奏、指指點點，真係好唔尊重啫。