呢嗱，水警前日至喺屯門截獲八個由珠海屈蛇來港嘅南亞裔同非洲裔偷渡客，尋日又喺附近海面捉到十三個來自蛇口嘅南亞裔人蛇，而帶領呢批人蛇嘅內地蛇頭居然只有十六歲，問你服未。

一批批人蛇由四面八方殺到，香港頂得幾耐吖？最令人嘆為觀止嘅係，依家啲人蛇唔使鬼鬼祟祟，而係大模廝樣入嚟，話到明嚟香港尋求政治庇護。水警承認，今年到依家截獲嘅非華裔非法入境者已經超過一千人，仲多過舊年全年總數。

咁都未夠恐怖，警方早排收到線報，指內地有近十萬名南亞裔同非洲裔人士等緊機會偷渡來港，目啲係以難民身份留低做「黑工」。偷渡客大軍壓境，睇怕唔使幾耐香港就會「淪陷」咯。

叮！話就話尋求政治庇護，其實係人都知，呢班人蛇絕大部分係經濟難民。講到底，都係港府自己捉蟲，今年三月初，高等法院裁定廿九名持「行街紙」嘅非華裔「難民」有權喺香港打工，人蛇集團隨即散播謠言，導致各路人蛇紛紛經內地偷渡來港搵真銀。

本報已經多次提醒港府，有關判決為所謂「政治難民」打開中門，令佢哋有恃無恐，必須盡快堵塞漏洞，否則香港遲早被踩沉，可惜當局置若罔聞。試諗吓，依家香港搵食艱難，有工開驚炒魷，冇工開聽揸兜，失驚無神湧嚟大批人蛇爭飯碗，叫打工仔點頂？

更可怕嘅係，偷渡潮仲帶嚟嚴重嘅治安問題，除咗種族衝突之外，偷盜、打劫、傷人案亦會進一步上升。依家阿蓋德恐怖組織已經揚言要向中國人報復，而南亞裔人士好多信奉伊斯蘭教，唔排除有恐怖分子以難民身份潛入香港發動恐怖襲擊，呢啲風險港府有冇考慮過？

叮！如果真係政治難民，香港梗有義務伸出援手啦，至弊睇勻全世界，絕大部分人蛇都係為咗掘金，純粹出於經濟目的。港府政策僵化，墨守成規，一味空談「人權」，唔考慮實際情況，簡直就係鼓勵偷渡、鼓勵犯罪。

冇錯，警方話就話會加強堵截，以及同內地相關部門多溝通，多交換情報，可惜呢啲治標唔治本，根本無助減少人蛇。

無論如何，人蛇問題已嚴重威脅本港經濟同治安，港府唔可以繼續扮鴕鳥坐視不理。入境法例有漏洞就要堵塞，難民政策有盲點就要澄清，必要時「即捕即解」亦在所不惜。須知香港只係彈丸之地，資源有限，加上依家經濟不景，連自己人都顧唔掂，如果唔採取果斷措施遏制偷渡潮，陸沉只係遲早嘅事。叮！