迪士尼樂園尋日邀請十幾位立法會議員同佢哋嘅家屬夜遊「迪士尼黑色世界」，喺迪士尼行政總裁金民豪親自領軍下，體驗新鮮出爐嘅驚嚇遊樂項目，旅遊界議員阿Paul謝偉俊、「象哥」黃定光、陳克勤、陳鑑林、馮檢基等紛紛變身「嘩鬼」玩到癲晒。
阿Paul話，畀大會安排嘅嘩鬼演員搞到出晒汗就真，但唔係驚到出汗，而係焗到出汗，事關遊樂館內人頭湧湧。嘩鬼演員熱情搞氣氛，佢又笑稱冇畀嘩鬼性騷擾，好失望喎！
講起「性騷擾」，不期然令人諗起甘乃威，阿Paul篤爆話，甘威本來報咗名玩埋一份，唔知係咪怕呢排黑仔撞鬼，所以臨時失場。象哥就話遊戲嘅驚嚇度只屬「濕濕碎」，冇咁易嚇親佢，但佢對仔女就玩得勁High。
