早幾日黃昏時間喺中環擺花街一間Coffee Shop撞到民政事務局副局長Francis許曉暉，見佢一邊歎咖啡，一邊欣賞牆壁上一幅一幅嘅藝術畫作，講開先知道佢好有藝術細胞，最近仲做中間人，協助本港年輕藝術家將啲藝術畫作品放喺咖啡室部分分店展出同出售。
之前都講過Francis當年就讀張祝珊英文中學時，曾遇上一位優秀美術老師，教她繪畫、攝影同黑房曬相技術，令佢培養出濃厚藝術興趣。點解佢大學唔修讀藝術，反而選讀中大工商管理呢？佢無奈咁話以前屋企開廠，所以期望佢讀商科幫到屋企盤生意。雖然係咁，佢話一直有keep住啲藝術細胞，做咗民政局後就多咗機會接觸藝術。
民政局依家主力推動空置廠廈發展成藝區，而剛才講到嗰間咖啡室《圖製城市》藝術展亦係該局籌辦嘅項目之一，Francis大讚畫作好有特色，仲呼籲大家如果睇啱嘅話，買幅支持吓本地藝術喎！