當局今年七月就救護車調派分級制推出諮詢文件，當時評估話五成召喚屬非危急個案，講到好似濫用白車不知幾嚴重咁，查實根本唔係呢回事。消防處抽查咗一萬宗救護召喚個案，發現非危急個案只佔一成左右，其餘都屬於危急個案，證實港府講大話。當局作大濫用白車數字，其實無非想推卸責任，迴避資源投放嚴重不足嘅問題，根本就係一個大騙局。

叮！奸商弄虛作假，就話想賺多幾個錢啫，當局作大濫用白車情況，就唔係講玩喇，牽涉到救護資源夠唔夠，需要搶救嘅病人能否以最快速度送到醫院。咁重要嘅數據，有關部門處理居然咁兒戲，隨口噏當秘笈，直頭係攞市民條命嚟較飛。

再講，就算非危急個案，亦唔等於百分百零風險。一般人醫學常識有限，覺得有唔妥，又擔心病情惡化，即call白車，一啲都唔出奇吖。現成例子就有啱啱做完「通波仔」手術嘅財爺鬍鬚曾，佢初頭都以為自己胃痛啫，冇乜大礙，點知送入醫院至發現原來咁大鑊。

如果實施白車分級制，接電話嗰位以為佢真係個胃唔舒服，將財爺掟咗去非危急嘅第三類別，白車姍姍來遲，咁就大件事喇。仲有，如果消防處真係按非危急個案有五成嚟分配救護資源，白車買少見少，咁就真係靠害咯。連消防處救護員會都話，除非增加救護資源，否則分級制根本解決唔到問題。

叮！白車服務唔掂已經唔係乜新聞咯。嗰支甩皮甩骨嘅老爺車隊，隨時死火跪低，延誤當食生菜，經常有病人懷疑因為白車遲到而失救，見怪不怪喇。

上個月香港就爆過一單令人想笑又笑唔出嘅「人肉白車」鬧劇。當日油麻地發生嚴重車禍，一名女子頭部重創等待救援，點知當時西九龍九個救護站同消防局全部冇白車可用，要由港島西區同東九龍調車去油麻地救人，正一等得嚟蚊都瞓啦！

冇計，七個消防員同救護員惟有組成「十四轆人肉白車」，徒步將傷者抬去最近嘅廣華醫院搶救，好彩路程得四百米，如果唔係，分分鐘又搞出人命。

叮佢個鎯鎯！咁樣嘅救護服務，簡直係香港嘅恥辱。講嚟講去，原因一字咁淺，投放資源完全跟唔上市民對白車服務嘅需求，當局唔肯增撥資源，反而諗縮數作大濫用白車數字，企圖將求救者拒於門外，呢個政府唔單止無能，直頭係無良！