小白觀點 咪阻人搵快錢

高錕攞咗今屆嘅諾貝爾物理學獎，大學師生個個鬆毛鬆翼，話會引發「高錕效應」，吸引更多學生投身科學研究就咁話喎！真係多謝夾盛惠嘞，你知啦，香港人最緊要搵快錢，你睇吓啲電玩遊戲吖，唔夠半日就crack晒，呢度唔係話冇科研人才㗎，不過要幾十年後至用得着，仲要少年癡呆冇攞專利，如果有個死口靚仔當高錕係偶像，真係靠害囉。

成日有人話港府唔識寶，將科研當係草，其實當係草都冇所謂吖，如果有人發現光纖嘅藥效等同於名貴嘅冬蟲夏草，鋸樹黨、偷鐵黨實即刻轉型做高科技嘅「掘纖黨」，聽講依家全世界嘅光纖夠環繞地球超過二萬五千次，呢鋪想窮都難！

網址：www.sunsiupak.blogspot.com

阿豪觀點 得把口講㩒實荷包

「光纖之父」高錕獲諾貝爾物理學獎，煲呔曾即刻發表聲明話係「香港驕傲」。之但係如果香港教育制度真係咁厲害，高錕又使乜遠赴英國深造？香港又係咪應該產生好多頂級科學家呢？

老實講，高錕話晒喺香港讀過書、做過校長，今次港府抽水都算近磅㗎喇。講開又講，豪伯係廣東高要人，大家都係「高」，唔知我可唔可以話高錕攞獎係「高字輩」嘅驕傲呢？

要真正發展科學，唔係口頭佔吓便宜就得，不如實實際際攞錢出嚟資助科研啦，我哋祖國每年投放喺科研嘅錢佔總產值百分之一點五，香港得百分之零點八咋陰功！仲話創新科技係六大優勢產業喎，笑死人啦！

網址：www.lukchiho.blogspot.com

網友觀點......

匿　名 唔好講笑啦，香港都有科研？連高達、大鐵人都未整到呀。

Quinn 咪發夢啦，你估高錕留喺香港研究會咁勁咩？係去咗美國先可以咁掂咋！

MM 樓上嗰位就啱嘞，去美國搞又得，去印度、中國、台灣搞亦得，香港？死路一條。

陳　星 唔係噃，香港大把人才吖，科大嗰個陳小朋友，寫埋書添，難保佢有朝一日拎番個諾貝爾文學獎。

ALi B 始終都係浸過鹹水香啲，冇計啦。

費　曼 嘩，高錕喺香港讀中學已經抽晒水，讀埋大學嘅話，咪全香港放假三日？

普通香港人 其實各地人性格唔同，唔使一定勉強要有科學家嘅，你又試吓叫高錕炒股吖，睇吓有冇我哋咁叻？

莊　子 高錕細個鍾意自己造「泥炸彈」，但係香港有口靚仔自己做實驗就畀人鬧爆，仲發乜鬼展科學吖！