呢排海洋公園搞緊哈囉喂活動，但遊客入到去唔係畀啲鬼嚇死，而係臭死，事關有人投訴公園冇每日清洗哈囉喂演員嘅戲服，搞到佢哋一身臭汗味，臭到怕怕。
每年哈囉喂都大收，臭氣沖天擺明趕客啫！若果趕晒啲客去米老鼠嗰邊咪弊？眼見勢色唔對，公園主席「扮嘢文」盛智文立即檢討，仲即刻補鑊，訂購一批除臭消毒機。聽聞部機價錢唔平，每部要三千幾蚊，仲聲稱可以喺幾分鐘內殺死衣物百分之九十九嘅細菌，兼有辟味功效添！
扮嘢文仲不忘力撐公園，話啲戲服不知幾衞生，但試過大熱天時化晒裝着住戲服，等出場已經熱到由頭濕到落腳，嗰種辛苦法確實不為外人道。佢又話每次演出後，演員穿着嘅衣服內層一定會洗乾淨，即使有啲戲服質地不宜清洗，都會徹底消毒咁話。
老實講，佢係扮嘢高手，當然知道箇中嘅問題，既然佢買得消毒機洗戲服，咁倒不如向演員提供埋止汗劑，等佢哋裏裏外外都咁乾淨同衞生，咁先可以真正擺脫污糟鬼嘅形象喎！