前教統局常秘羅范椒芬離開官場後仍難捨教育，佢做咗港區全國人大代表，視野都北望神州。尋日港大搞咗個「中國農村教育發展」論壇，佢以過來人身份分享喺農村教英文嘅經歷，話兩年前發起一個「農村英語老師培訓計劃」，由佢帶住十幾位香港義工老師，北上重慶四個貧窮縣嘅學校，教一百位農村老師英文。
羅范話農村教學資源極之貧乏，想搵本英文書都難，但老師同學生嘅好學態度就令佢好感動。佢又話將香港所得嘅教改經驗搬上農村一樣大派用場。
猶記得佢當年掀起教改，畀唔少老師鬧到飛起，令佢黯然下台，估唔到有機會喺內地農村搞教育，難怪佢話明年上京開兩會時，一定會反映農村老師同學生嘅心聲喎。
