白鴿黨立法會議員甘乃威對女助理「有好感」事件，除令佢同白鴿黨周身蟻，亦喺政界掀起恐慌，男士人人自危。好似外號「五散人」嘅五名獨立功能組別議員日前開會，原來亦有就甘威事件進行非正式交流，仲有研究點樣可以避免同類事件發生喺自己身上添！
其中資訊科技界嘅譚偉豪話今後同幾位女助理單獨傾偈，都係錄定音穩陣啲。醫學界嘅梁家騮擔心係人都知佢仲係「鑽石王老五」，傳出類似緋聞嘅機會實特別大。
保險界陳健波話個女助理特別同佢聲明，話對佢冇乜好感，相信辦公室一定唔會發生呢啲嘢，希望老闆唔好因為要避嫌而炒佢。
不過出名口花花嘅廠商會立法會議員林大輝，就認為純粹向女士「表示傾慕」並唔係罪，只要唔涉及鹹豬手或真正嘅越軌不忠，其他人就唔應該說三道四。佢強調唔會因為今次事件而收吓把口，會繼續向啲女助理同女記者「表示好感」，「讚你一句就使死你，點會有人誤會？」對於甘威被指喺事件中講大話出現誠信問題，大輝亦不以為然：「啲高官夠成日講大話啦，日日都話經濟復甦！」