本文重點
經濟動力尋日喺中大搞分享會，而主持人立法會議員Jeffrey林健鋒（圖）都好識做，一開口就先恭賀中大前校長高錕攞諾貝爾物理學獎。
同為聖若瑟舊生
同樣係聖若瑟書院舊生嘅Jeffrey，一講起呢位師兄就讚不絕口，佢話自己做聖若瑟校友會會長時，搞親活動高錕可謂逢請必到，而佢嘅為人和藹可親、好溫文，從來冇架子。
Jeffrey仲讚呢位師兄好關心中大同聖若瑟書院嘅事務，若中大同聖若瑟書院要加設施，佢都義不容辭，所以呢位師兄作為華人典範實在當之無愧。
被問到好多人都話呢個係遲嚟嘅榮譽，Jeffrey都點點頭；再追問佢高錕好似唔多知道呢件事嘅時候，Jeffrey好肯定咁話應該知道，只不過冇咁精靈啫！