本文重點
中環立法會大樓外嘅停車場有幾大，真係一眼見晒，橫擺掂擺都只泊到二十零架車，但議員就有成六十位，再加埋啲秘書處職員，一遇上立法會開大會就會逼到爆晒倉。就算喺冇會開嘅日子，亦有唔少議員為咗貪方便或慳番啲泊車錢，將架車泊咗喺立法會過夜或喺出開中環時借嚟暫時擺住先。富貴黨田北俊同白鴿黨單仲偕，都講過佢哋冇再做議員後，其中一樣最唔捨得嘅就係個停車場。
暫時仍冇罰則
為免停車場經常爆滿同維持公平原則，秘書處一向都嚴禁議員喺任何時間內，泊多過一架車喺停車場，即係唔准Double Parking啦，但有關規定並冇任何罰則，所以不時都有議員有意無意咁違規。正如今年四月講過，當時被「青島張茆」緋聞纏身嘅旅遊界立法會議員阿Paul謝偉俊，為咗趕住同白姐姐外遊箍煲，同時將旗下嘅兩架靚車泊咗喺立法會停車場，隔咗成個禮拜先揸番走，最後畀秘書處發信警告。
阿Paul嗰次違規仲可以算係事出緊急，但據聞有個別議員即使冇特別事幹，都會同時泊兩架車喺立法會，通常其中一架喺返去開會時泊落嘅，但放工時因為唔知乜嘢原因冇揸走，到第二日返工或者出開中環食飯時，又揸過另一架去。
由於通常有得兩架車嘅，都會有司機或其他人幫佢哋揸番其中一架車走，違規情況唔會維持好耐，秘書處亦唔會咁無情立即發信警告佢哋，但始終都係違咗規，仲有就係作為立法者，竟然公然違規，點講得過去㗎！秘書處近日就趁新一個立法年度開始，再次向全體議員發信重申有關規定。秘書處再次下令唔准Double Parking，希望佢哋識得自律同自重，咪再濫用停車場喇！