外國月亮係咪圓啲唔敢講，內地同胞過中秋，心情一定靚過港人，尤其今年中秋挨近十一，內地豪客利用長假期嚟港掃貨，更加得心應手，滿載而歸。

有中成藥連鎖店尋日趁黃金周開新店，吸引咗大批個人遊內地客，結果旺丁又旺財，萬幾蚊一盒嘅名貴中藥，一個朝早就賣出幾盒。咪以為高檔名牌至有人吼，荃灣有個嬰兒及兒童用品展，嚟咗五百位內地客狂掃奶粉等貨品。

嬰兒奶粉同貴價藥材濕濕碎咋，連香港豪宅都變咗內地人掃貨對象。據講，呢次黃金周有幾百個內地豪客嚟港買樓，仲係唔貴唔買，一出手閒閒地過千萬。唔怪得近年香港有啲樓盤講明只賣畀內地客喇。

有人歡樂有人愁，比起呢班內地豪客，香港平民百姓就慘咯，人工冇得加不特止，出街買嘢幾乎樣樣加價。對好多窮人嚟講，百幾蚊盒月餅，咪講話買，聽到都肉赤；中秋做節買隻雞都要成兩百元，蔬菜生果乜都加，想食餐團圓飯都唔容易，呢個中秋認真難過。

叮！望住同一個月亮，中港兩地心情差天共地。高官話金融海嘯衝擊已經去得七七八八，已望到隧道盡頭嘅「曙光」喎，實情全部係虛火。表面睇市面人頭湧湧，但主要靠個人遊嘅內地同胞撐住，香港人嘅消費能力及消費意欲真係王小二過年，一年不如一年。

事實勝於雄辯。家陣全港攞綜援嘅有五十萬人，比回歸前仲多二十二萬；在職貧窮家庭超過十九萬戶，其中相當一部分家庭收入仲低過綜援金額。仲有，失業率仍然維持喺百分之五點四高位，二十一萬人冇工開，連高官都話情況唔樂觀。試問喺咁嘅情況下，邊夠膽去消費，點過快樂中秋吖？

叮！富者愈富，貧者愈貧，咪係特區政府最大「政績」囉。回歸十二年，香港唔止停滯不前，仲一路打倒褪。經濟轉型交晒白卷，乜港物港，全部大隻講；乜中心物中心，市民愈睇愈傷心。「二十年來最好」、「黃金十年」，呃鬼食豆腐咩！

煲呔曾上北京睇完十一慶典之後話，同中央多個部委討論過香港經濟發展嘅議題，部分成果會喺嚟緊嘅施政報告反映出來。唔使再吹水喇，港府除咗伸手攞多啲着數，仲諗得出乜嘢好橋吖？

蘇東坡當年對住朗月問：「明月幾時有，把酒問青天。」唉，對香港人嚟講，明月年年都有，但前路茫茫，中秋年年難過，就算想把酒問青天，都未必有錢買酒，何況香港根本見唔到青天啦。叮！