講起上京參加建國六十周年慶典有乜體會？蔡會長即時扁嘴話冇睇到閱兵就急急趕返香港喎。到底有乜急事？原來佢喺九月二十八號抵京後突然收到風，話閱兵儀式守衞森嚴，本來計劃一睇完閱兵就同一眾中總會董「撤退」，搭中午一點機返港，點知大會話唔敢保證派到專車送佢衝出重圍；即使趕到機場都唔擔保空中管制已解除，班機可以如期起飛。

咁咪好大劑？事關中總贊助十．一煙花，蔡會長要以主人家身份返港主持煙花匯演，進退兩難下，惟有忍痛放棄睇閱兵，單拖搭九月三十號嘅夜機返港，所以食埋國宴就要午夜狂奔趕飛機嘞！

不過，留喺北京睇完閱兵嘅一眾中總會董，竟然可以按時返到香港喎！咁蔡會長會唔會呻笨呢？蔡會長都話錯失咗十年一度嘅閱兵儀式好可惜，但為咗萬無一失，寧願喺香港睇轉播，好過臨時甩轆喎！