胡恩威早兩年一度成為煲呔曾嘅「大紅人」，西九文化區諮詢小組、公共廣播服務檢討委員會，以至政府好似好重視嘅經濟機遇委員會，都搵咗佢做委員，但最近就陸續畀政府「搣柴」。有人估計係因為佢成日喺會內會外繼續鬧政府所致，但佢就覺得政府根本由頭到尾都只係想借佢過橋，過咗橋就立即抽番起塊板，最後搞到佢跌咗落水。
尋日佢接受某網上電視台訪問時，自爆擔任行政總裁嘅藝團「進念二十面體」，喺下年度將會畀藝發局勁削三成資助，少咗成二百萬元經費，可能要炒六、七個職員先至維到皮；其餘八個每年攞最多政府資助嘅旗艦藝團，亦分別被削資三至五成，合共少咗成四千五百萬元撥款，肯定會令本地藝術界爆發大規模嘅減薪裁員潮。
喺西九管理局成立前，佢話民政局官員每年最少會同各藝團開兩次會，依家就幾乎係零接觸，唔知係新上場嗰批官員偷懶，定係政府打完齋唔要和尚。
講起公共廣播服務，佢仲火滾，話檢討委員會報告嘅最重要建議，就係公共廣播應獨立於政府，政府卻反過嚟將公共廣播判番畀身為政府部門嘅香港電台做，並聲稱已落實咗委員會嘅絕大部分建議，直情係騎劫咗佢哋份報告。