馬會尋日再推出一百二十五周年紀念馬票，主席阿John陳祖澤尋日去到舊天星碼頭投注站，自掏四百蚊購買第一套馬票，實行做埋生招牌。今次嘅紀念馬票有一千二百五十萬元足金做頭獎，被問到如果中獎會點用筆巨獎，佢好慷慨咁話會捐番出嚟做善事，但就未決定會捐畀邊啲慈善機構。
阿John又話馬票勾起佢唔少兒時回憶，記得小時候每逢有大馬票推出都係社會大事，當時甚至連茶樓都有得賣，好多婆仔、細路仔會向茶客推銷馬票，原價每張兩蚊嘅馬票，佢哋會賣兩個一，阿John諗起都忍唔住要讚佢哋有生意頭腦。
十一月十五號馬會喺沙田馬場舉行一百二十五周年盃，跑出頭馬嘅馬匹編號，如果同馬票上嘅馬匹號碼相同，嗰批獎券就會進行抽獎，結果會喺馬會網站公布。