新任金管局總裁「攞命陳」陳德霖，未上任已頭頭碰着黑，首先畀佢上手任志剛「截胡」報喜，喺接受電台訪問時搶先預告咗理應由攞命陳公布嘅外匯基金第三季度業績，指基金喺佢管理下首三季合共勁賺咗近千億元。如果港股唔好彩喺第四季大幅回落，令外匯基金全年盈利跌到得番幾百億，責任就全部落喺攞命陳身上，名副其實係彩就冇得你攞，鑊就肯定你孭。

金管局返工首日即冧市

攞命陳另一樣當黑嘅係，任總原則上喺十月一號凌晨至正式卸任，亦即攞命陳喺當日之前都係一介平民，因此喺十．一前公布嘅建國六十周年閱兵特區觀禮團名單，自然就冇佢份。攞命陳現年五十五歲，根據任總退休嘅先例，肯定唔可以做到建國七十周年，令佢無緣喺天安門城樓睇閱兵。

正所謂福無重至，禍不單行，攞命陳尋日首日返工隨即又行衰運。佢喺金管局總部樓下見記者時，一方面強調佢上任其中一項首要工作，就係審慎管理外匯基金，另方面又話目前全球經濟同金融系統仍面對不明朗同不穩定因素。最後點知好嘅唔靈醜嘅靈，港股尋日跟隨外圍急瀉，最多跌過六百幾點，雖然尾場跌幅收窄至五百七十九點，但仍失守五十天移動平均線，意味短期內仲有可能再跌。

今次跌市除令外匯基金賺少唔知幾多億外，相信亦會令唔少股民憶起「秋官效應」。下次攞命陳再上電視評論金融市場時，大家記住綁緊安全帶喇！